見工面試，給僱主的第一印象最重要。要保持專業形象，頭髮護理係重點。炎炎夏日，動輒滿頭大汗，再加上頭油分泌，往往令到頭髮「油立立」。星級髮型師 Y Ng @ La Mod教大家如何在炎熱夏天去見工面試時，保持頭髮清爽，令形象加分。
問：就你的觀察及經驗，男及女生各有甚麼頭髮問題？
Y：夏天天氣炎熱，男士多數都係較容易流汗，好多時在屋企已整理好的髮型出到街都會走晒樣。問題在於：( 1 ) 經常唔梳頭，就算梳都無認真梳；( 2 ) 頭髮因為出汗而變得「油立立」；( 3 ) 唔肯用髮型產品，覺得唔需要。至於女性流汗一般都較少，但 ( 1 ) 長頭髮的往往都受到零碎髮絲影響整體的乾淨感覺；( 2 ) 經常束一條鬆散馬尾便算；( 3 ) 經常用頭髮去遮住面頰；( 4 ) 短頭髮的有時會整得過份誇張，有去Party的感覺。
問：男生及女生在夏天護理頭髮方面，有甚麼特別要注意的地方？
Y：男士經常頭油分泌過多，盡量係選擇一些清爽頭皮嘅洗頭水同護髮產品，係洗頭過程盡量認真洗乾淨，以免有多餘污蔑物留係頭皮。女士方面，因為女士容易有絲碎頭髮，所以正確係每日洗頭後使用合適護髮產品，例如係髮尾油、護髮乳、頭髮精華，只要使用方法正確，會有好大幫助。
問：女生若喜歡配戴頭飾的話，要注意甚麼？
Y：如果女士喜歡帶頭飾，宜以簡單淨色為主，過份花巧只會感覺做作。
問：若想清爽得來而又夠潮的話，你有甚麼建議？
Y Ng：對於清爽髮型來講，只要保持頭皮及頭髮的清潔，以及用合適的頭髮產品 便足夠。我建議男士在見工前先剪好一個比較清爽同易整理的髮型，而Styling方面，用Gel會較好，因可以將髮型保持得耐一點。
另外，我建議長頭髮女士在見工前使用髮乳或定型產品去束一條馬尾，馬尾位置可按個人喜好，那便給人既乾淨又精神的印象。短髮女士可以使用有定型作用的產品去整理頭髮，如果可以接受向後梳就最好，因為可以露出面顏，讓面試官見到你精神煥發的一面。見工髮型，最重要是不用太花巧，自然舒服就可以。
 | 想親身向星級髮型師Y Ng請教夏天見工的更多髮型貼士，切勿錯過《招職》六月就業及升學展覽。 日期：2016年6月21及22日﹙星期二、三﹚ 時間：中午12時 – 下午7時 地點：荃灣愉景新城 |
文：Samuel
以上文章刊於《招職》。
